（店主有感而發）
仲記得 201X 年嗰陣，大約中二中三左右，第一次同成班同學 Book Party Room 當班會活動，就嗰 4 個鐘大家已經玩得好開心。再大個少少，成日去唱 K，一時去 K 房，一時就 Book Party Room。
去到後來經歷疫情同限聚令，見到有唔少 Party Room 都捱唔住，而自己又成日同朋友聚會，諗諗吓：不如我哋自己整一間出嚟！
疫情完咗嗰一排，真係唔覺有乜 00 後會出嚟話要整 Party Room。可能嗰陣時經濟都麻麻（當然依家都係），但我哋自己就係單純想有個屬於大家嘅空間去聚會。
無錯，點解好多人都唔揀出面啲房？明明人哋平咁多，設備甚至多過我哋，但點解都仲有人肯花多少少錢嚟我哋呢度？
坦白講，連店主自己以前去過咁多間 Party Room，都冇邊一間係真正印象深刻嘅，甚至有唔少早就已經執埋。出面大部份 Party Room 都喺度宣傳自己啲設施有幾新、裝修有幾靚、麻雀機同 Game 有幾齊。
但好少有人講過最核心嘅一件事——「到底我哋租呢個空間，真正為嘅係乜？」
設施會過時，遊戲會玩厭，但同朋友聚會嘅真正意義，從來都唔係單靠幾部機器。
真正難得嘅，係大家可以暫時甩開讀書同工作嘅煩惱，圍坐埋一齊「急罰盞夜闌燈滅」（註1）——嗰種推杯換盞、玩到盡興、飲到微醺，就算深宵燈火漸熄都捨不得走嘅溫度同陪伴。
我哋希望：「紅霞 Tasogare 唔單止係一間房，而係成為大西北居民一個真正嘅『回憶製造點』。」
每一次望到客人喺度留低嘅相片，見到大家玩得咁投入、笑得咁大聲、飲到醉晒，呢啲畫面先係我哋開業最想見到嘅心意。希望每一位嚟到「紅霞 Tasogare」嘅客人，帶走嘅唔只係幾張相，而係多年後提起，依然會會心微笑嘅難忘時光。
註1：「急罰盞夜闌燈滅」出自元代散曲家馬致遠的雙調．夜行船．秋思，意思是趕快把罰酒喝乾，否則夜深燈滅就來不及喝了，比喻人生苦短，應及時行樂。勸喻世人趁著有限的光陰及時享受生活，不要將時間白白耗費在無盡的名利追逐中。
現今世代，我哋 00 後多元斜槓、活用 AI，出世就活喺網絡世代，學咩都快過人。我哋肯去打破傳統、改變舊有規矩，用心嘅程度早已被客人注意到。
引入 Apple TV 搭配 Apple Music 點歌系統已經係其一。
再講個冷知識：其實開業初期，我哋嘅通宵包場 Session 跟返業界傳統，都係 Set 做 6 點或者 8 點完。去到有一排突然喺度諗：「其實 Set 咁早完做乜？嗰個時間啱啱先有車，人又未完全清醒。」
當時成日都會遇到啲客因為太趕，完全無熄任何設備就走，或者醉得好誇張。突然有一刻靈光一閃：「不如免費將離場時間改後少少囉！」
其實咁做對客人有好多好處：
- 變相更抵玩： 相同價錢，玩嘅時間直接拉長！
- 充足時間休息： 唔使急急腳走，客人有多啲時間瞓陣或者醒酒。
- 自由選擇離場時間： 對比起其他大部份房 6 點 / 8 點就要迫住走，我哋嘅客人可以完全按自己步調決定幾點離開。
所以點解 Book 我哋房嘅客人，我哋都會特別強調：「時間方面可以直接玩到 10 點 💁🏻♀️ 幾點走價錢都係一樣！」
想預約或者了解報價，歡迎 WhatsApp 查詢，我哋會盡快回覆你！